खेलकुदका कार्यक्रम व्यवस्थित गर्न परिपत्र

कास्की - गण्डकी प्रदेशमा खेलकुदसँग सम्बन्धित कार्यक्रम छोटो, छरितो, अनुशासित र मर्यादित बनाउनका लागि प्रयास सुरु गरिएको छ । प्रदेश खेलकुद परिषद्ले प्रदेशमा हुने खेलकुद प्रतियोगिता तथा खेलकुदसँग सम्बन्धित कार्यक्रमको उद्घाटन र समापन कार्यक्रमलाई व्यवस्थित गराउनका लागि ११ वटै जिल्ला खेलकुद विकास समितिलाई परिपत्र गरेको छ ।

खेलकुदका कार्यक्रमसमेतमा लामो र पट्यार लाग्ने गरी आसन ग्रहण र शुभकामना मन्तव्यमा घण्टौँ लाग्ने गरी हुँदै आएका कार्यक्रमलाई छरितो बनाउनका लागि सबै जिल्ला खेलकुद विकास समितिलाई परिपत्र गरिएको प्रदेश खेलकुद परिषद्का सदस्य सचिव श्रीधर शर्माले बताउनुभयो ।

उहाँले भन्नुभयो, “परिषद्ले ११ वटै जिल्ला खेलकुद विकास समितिलाई पत्र लेख्दै खेलकुद कार्यक्रममा आसन ग्रहण, वक्ताको पट्यार लाग्दा भाषण छोट्याउन आग्रह गरेका छौँ । खेलकुदका उद्घाटन तथा समापन कार्यक्रमलाई छोटो, छरितो तथा फजुल खर्च निरुत्साहित गर्ने योजनामा छौँ ।” 

शर्माका अनुसार कार्यक्रमको आसन ग्रहण र मन्तव्य कार्यक्रमलाई छोटो, छरितो, अनुशासित र मर्यादिन बनाउने र विदेशबाट आयातित माला र फूलको प्रयोग गरिने छैन  । यसैगरी कुनै पनि कार्यक्रममा प्लाष्टिकजन्य तथा वातावरण प्रदुषणजन्य सामग्री, ठूलो ध्वनी आउने साउण्ड सिस्टेम, महङ्गा तथा प्रयोगमा नआउने खालका मायाँको चिनो, खादा तथा दोसल्ला प्रयोगसमेत नगर्न निर्देशन गरिएको छ । 

“कार्यक्रम तथा समारोहमा स्थानीय उत्पादनलाई टेवा पूग्ने गरी सामग्रीको प्रयोग गर्न र स्थानीय उद्योगलाई प्रोत्सहान हुनेगरी सामग्री प्रयोगमा ल्याउन आग्रह गरेका छौँ,” शर्माले भन्नुभयो । 

परिषद्ले खेल क्षेत्रलाई अनुशासित, मर्यादित र व्यवस्थितरुपमा सञ्चालन गर्न जिल्ला खेलकुद विकास समिति, खेल सङ्घसंस्था, क्लब र सरोकारवालाहरुसँग अन्तक्रिया गरिने जनाएको छ ।