काठमाडौँ– राष्ट्रिय स्वतन्त्र पार्टी (रास्वपा)का सांसद रवि लामिछानेले एकल महिलाका सन्तानले नागरिकता पाउने प्रक्रिया गलत भएको बताएका छन् ।
आज प्रतिनिधिसभाको बैठकमा बजेटामाथिको छलफल कार्यक्रममा बोल्दै उनले नागरिकता विधेयकमा जन्मसिद्ध नेपाली नागरिकका सन्तान र एकल आमाका सन्तानले नागरिकता पाउने प्रक्रियामा विभेद गरिएको जिकिर गरे ।
रास्वपाका सभापतिसमेत रहेका लामिछानेले समग्र नागरिकता विधेयकका बारेमा नभइ वैवाहिक अंगिकृतका बारेमा मात्रै पार्टीले छलफल गर्न खोजेको बताए । एकल आमाहरुका सन्तानले नागरिकता लिँदा आमाले बाबुको पहिचान नै नखुलेको स्वघोषणा गर्नुपर्ने प्रावधान गलत भएको उनको भनाइ छ ।
लामिछानेको पार्टी रास्वपा नागरिकता विधेयकविरुद्ध लागेको भन्दै मधेसका केही जिल्ला लामिछानेविरुद्ध प्रदर्शनसमेत भए ।
लामिछानेले भने नागरिकता विधेयकका सम्बन्धमा आफ्नो पार्टी कुनै समुदायको विरुद्धमा नलागेको स्पष्ट पारेका छन् ।
