काठमाडौँ– नर्वेजियन स्ट्राइकर एर्लिङ हालान्डको कीर्तिमानी पाँच गोल गरेपछि इंग्लिस क्लब म्यानचेस्टर सिटी युइएफए च्याम्पियन्स लिग फुटबल प्रतियोगिताको को क्वार्टरफाइनलमा प्रवेश गरेको छ ।
गएराति घरेलु मैदानमा भएको प्रि–क्वार्टरफाइनलको दोस्रो लेगमा जर्मन क्लब आरबी लाइप्जिगमाथि सिटीले ७–० को फराकिलो जित निकाल्दै सिटी अन्तिम ८ मा पुगेको हो ।
यी दुई टोलीबीचको पहिलो लेगको खेल १–१ गोलको बराबरीमा सकिएको थियो । यसर्थ, समग्रमा ८–१ नतिजासहित सिटी अन्तिम आठमा पुगेको हो ।
इतिहाद रंगशालामा सिटीका फरवार्ड हालान्डले ५ तथा एकाई गुन्डोगान र केभिन डे ब्रुएनेले एक-एक गोल गरे ।
यससँगै हालान्डले नयाँ कीर्तिमान राखेका छन् । च्याम्पियन्स लिगको एकै खेलमा ५ गोल गर्ने उनी सबैभन्दा कान्छो खेलाडी बनेका छन् । यसअघि अर्जेन्टिनाका लियोनल मेसी र ब्राजिलका लुइस एड्रियानोले एकै खेलमा पाँच गोल गरेका थिए ।
