युएईलाई हराउँदै कम्तीमा ओडिआई मान्यता जोगाउने सुरमा नेपाल
काठमाडौँ– नेपालले आज युएईविरुद्ध आइसिसी क्रिकेट विश्वकप लिग– २ को महत्वपूर्ण खेल खेल्दैछ ।
यो खेल कीर्तिपुरस्थित त्रिवि क्रिकेट मैदानमा बिहान ९ः३० बाट सुरु हुनेछ । घरेलु टोली नेपाल आज युएईलाई हराउँदै कम्तीमा एकदिवसीय (ओडिआई) मान्यता जोगाउने सुरमा हुनेछ ।
नेपाल अंक तालिकामा नेपाल पाँचौँ स्थानमा छ । नेपालले ३३ खेलमा ३४ अंक जोडेको छ ।
अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ ।
नेपालले यदि युएईलाई हराउँदा ३६ अंकका साथ चौथो स्थानमा उक्लनेछ । बाँकी दुवै खेलमा पराजित भए पनि नेपाल शीर्ष पाँचमा रहने छ ।
यस्तोमा नेपालको ओडिआई मान्यता बच्नेछ ।
अर्कोतिर, लिगको शीर्ष तीनमा रहेमा नेपाल ओडिआई विश्वकपको छनोटमा जीवितै रहनेछ । यसर्थ, नेपालका लागि आजको खेल धेरै महत्वपूर्ण छ ।
घरेलु मैदानमा जारी त्रिकोणात्मक सिरिजको पहिलो खेलमा नेपालले पपुवा न्युगिनीलाई ५२ रनको फराकिलो अन्तरले हराएको थियो ।
युएई भने ३३ खेलमा १४ मा जित र १६ मा हारसहित ३१ अंकका साथ छैटौं स्थानमा छ । आज पराजित भए उसले ओडिआई मान्यता गुमाउने छ ।