जिल्ला स्तरीय कोष स्थापना गरिने

त्रिशूली– विपद् तथा भइपरी आउन सक्ने तथा भवितव्य घटनाबाट पीडित भएकालाई राहत तथा क्षतिपूर्ति उपलब्ध गराउन नुवाकोटमा कोष स्थापना गरिने भएको छ ।

यसका लागि जिल्लामा रहेका स्थानीय तहसहित बाग्मती प्रदेश सरकारबाट समेत सहयोग जुटाउन लागिएको हो ।

स्थापना गर्न लागिएको कोषले आर्थिक अवस्था कमजोर भएका तथा विपन्न व्यक्तिलाई उपचार सुविधा, उनीहरूको पालनपोषण, शिक्षा तथा रोजगारको सिर्जनासम्मको योजनालाई लक्ष्य निर्धारण गरिएको नुवाकोटका प्रमुख जिल्ला अधिकारी किरण थापाले जानकारी दिए ।

उनका अनुसार कोषमा रकम संकलन गर्ने र क्रमशः थप गर्दै लगेर प्राप्त हुने ब्याजबाट पीडितलाई राहत उपलब्ध गराउन केन्द्रित गराइने छ ।

‘पीडित हो भन्ने यकिन भए पनि पीडकको पहिचान खुल्न नसक्दा राहत तथा क्षतिपूर्ति भराउन सकिँदैन’, प्रजिअ अधिकारीले भने, ‘३ तहमा रहेका सरकारसँग पनि अहिलेसम्म यससम्बन्धी स्पष्ट कानुनी आधार नभएकाले जिल्लास्तरीय कोष खडा गर्न लागिएको हो ।’