काठमाडौँ – नेपाल टेलिकमले फाइभजी सेवातर्फ उपकरणको जडान गरी परीक्षण जारी रहेको जनाएको छ ।
टेलिकमको १९औँ वार्षिकोत्सवका अवसरमा टेलिकमका प्रबन्ध निर्देशक सुनील पौडेलले फाइभजी सेवा परीक्षण चरणमा रहेको बताए। उनले फाइभजी प्रभावकारी रूपमा सञ्चालन गर्नेगरी पूर्वतयारीमा रहेको बताएका छन् ।
जिएसएम प्रविधिअन्तर्गत हाल सञ्चालनमा रहेको मोबाइल सेवा र नयाँ आउने फाइभजी सेवा प्राविधिक रूपमा नै फरकरुपमा सञ्चालन हुने उनको भनाइ छ ।
कम्पनीले एउटै फाइबरबाट फोन, इन्टरनेट र टेलिभिजन सेवा उपलब्ध हुने एफटिटिएच सेवा देशव्यापी बिस्तार गरिरहेको छ । यसअघि मुलुकका ६८ जिल्लामा विस्तार गरिएको एफटिटिएच सेवा अन्य जिल्लामा पनि पुर्याउने योजना अघि बढाइएको नेपाल टेलिकमको भनाइ छ ।
७३९ स्थानीय तहमा फोरजी
वायरलेस ब्रोडब्याण्ड अर्थात् फोरजी एलटिइ सेवाको देशव्यापी विस्तार गरिएको टेलिकमले जनाएको छ । हालसम्म ७७ जिल्लाका ७३९ स्थानीय तहमा यसको पहुँच पुगेको छ भने आयोजनाको ९८ प्रतिशत कार्य पूरा भइसकेको कम्पनीले उल्लेख गरेको छ ।
फोरजी नेटवर्क विस्तारसँगै फोरजी डाटाको खपतमा उल्लेखनीय वृद्धि भएको र नयाँ प्रविधिका रुपमा ई-सिमकार्डको देशव्यापी वितरण गरिरहेको प्रबन्ध निर्देशक पोडेलले बताए। डाटा सेवाको माग पूरा गर्न वायरलेस होम ब्रोडब्याण्ड सेवा उपलब्ध गराइएको छ । देशका अधिकांश स्थानमा फोरजी एलटिइ सेवा विस्तारसँगै भोल्टेजको प्रयोग उल्लेख्यरुपमा वृद्धि भएको छ ।
२६ अर्ब ४१ करोड राजस्व
मुलुकका सार्वजनिक संस्थानमध्ये हालसम्म सबैभन्दा नाफा कमाउने र राज्यलाई बढी राजस्व तिर्ने नेपाल टेलिकमले अघिल्लो वर्ष सरकारलाई २६ अर्ब ४१ करोड राजस्व तिरेको छ । टेलिकमका प्रबन्ध निर्देशक पौडेलका अनुसार आव २०७७/७८ मा विभिन्न कर तथा गैरकर गरी कम्पनीले उक्त रकम राजस्व बुझाएको हो ।
आर्थिक वर्ष २०७८/७९ मा कम्पनीको कूल आय ४४ अर्ब ३७ करोड पुगेको छ भने कम्पनीको खुद मुनाफा ८ अर्ब ४७ करोड भएको छ । चालु आवको पुस मसान्तसम्म कम्पनीले २१ अर्ब ८० करोड राजस्व प्राप्त गरेको छ ।
टेलिकमको भ्वाइस सेवातर्फ २०७९ मङ्सिर अन्त्यसम्ममा ग्राहक आधार २ करोड १३ लाख २५ हजारभन्दा बढी छ । जसमध्ये जीएसएम मोबाइल सेवाका ग्राहक २ करोड १ लाख ८६ हजारभन्दा बढी, सिडिएमए सेवाका ४ लाख ३६ हजार र पिएसटिएन सेवाका ग्राहक ४ लाख ५५ हजारभन्दा बढी छन् ।
त्यसैगरी एफटिएच भ्वाइस सेवाका ग्राहक २ लाख ४७ हजार तथा एफटिएच डाटा सेवाका ग्राहक २ लाख ११ हजार छन् । चालु आवको असोज महिनासम्म भ्वाइस सेवातर्फ कम्पनीको बजार हिस्सा ५२ दशमलव २४ प्रतिशत छ।
इन्टरनेट डाटा सेवातर्फ २०७९ मङ्सिरसम्म कम्पनीको डाटा (इमेल, इन्टरनेट आदि) सेवा प्रयोगकर्ता कूल २ करोड ६ लाख १८ हजार ६ सयभन्दा बढी पुगेका छन् । सोमध्ये जिएसएम मोबाइलको डाटा सेवाका प्रयोगकर्ता २ करोड १ लाख ६ हजार एडिएसएल सेवाका प्रयोगकर्ता ७८ हजार र एफटिएच डाटा सेवाका प्रयोगकर्ता २ लाख ११ हजार छन्।
मध्यपहाडी लोकमार्गलाई आधार मानी प्रदेश १, मधेस प्रदेश र बागमती प्रदेशका जिल्ला, नगरपालिका र गाउँपालिकालाई समेट्ने गरी अप्टिकल फाइबर बिछ्याउने कार्य तीव्र गतिमा अघि बढाइएको छ । सो क्षेत्रमा हालसम्म १ हजार ३२६ किमी फाइबर बिछ्याउने कार्यसम्पन्न भएको छ ।
