कोलम्बियाको विद्रोही नियन्त्रित क्षेत्रका ५० भन्दा बढी सैनिक स्थानीयको कब्जामा

बगोटा – देशको दक्षिण–पश्चिमको छापामार नियन्त्रित क्षेत्रका स्थानीय बासिन्दाहरूले आइतबार ५० जनाभन्दा बढी कोलम्बियाली सैनिकहरूलाई बन्धक बनाई गिरफ्तार गरेको सेनाले जनाएको छ।

सैनिकको प्लाटुनले मिके क्यानियने र यस क्षेत्रको नगरपालिकाको एक भाग एल टम्बोमा अपरेसन गरिरहेको समयमा स्थानीयले सेनालाई शनिबार नियन्त्रणमा लिएका हुन्।

आइतबार एल प्लेटाडोतिर गइरहेको अवस्थामा सैनिकहरूको अर्को समूहलाई कम्तिमा २०० बासिन्दाहरूले घेराबन्दी गरेको जनाइएको छ।

दुवै घटनामा चार गैरकमिसन अधिकृत र ५३ जना पेशेवर सैनिकहरू आफ्नो स्वतन्त्रताबाट वञ्चित रहेको सेनाले बताएको छ।

कोलम्बियाका द्वन्द्वग्रस्त क्षेत्रहरूमा विद्रोही समूहहरूले समय समयमा नागरिकहरूलाई सुरक्षा बललाई अघि बढ्नबाट रोक्नका लागि कारबाही गर्न आदेश दिन्छन्। उनीहरूलाई सामान्यतया मानव अधिकार सङ्गठनहरूको हस्तक्षेपपछि घन्टौँ पछि रिहा गरिन्छ।

जनरल फेडेरिको अल्बर्टो मेजियाले एक भिडियोमा यो समुदायमा घुसपैठ गरेका गुरिल्लाहरूले गरेको अपहरण भएको  बताएका छन्। तत्कालीन सरकारसँग सन् २०१६ को शान्ति सम्झौतामा हस्ताक्षर नगर्ने असन्तुष्ट समूह तथाकथित सेन्ट्रल जनरल स्टाफ (इएमसी) बाट किसानहरूले आदेश प्राप्त गरेको सेनाले जनाएको छ।

राष्ट्रपति गुस्ताभो पेट्रोले आइतबार गुरिल्लाहरूको मेक्सिकन कार्टेलसँगको कथित सम्बन्धलाई उल्लेख गर्दै किसानहरूलाई विदेशीहरूको आज्ञा पालन गर्ने सशस्त्र समूहहरूमा विश्वास नगर्न आग्रह गरेका छन्।

राष्ट्रपति पेट्रोले सामाजिक सञ्जाल एक्समार्फत भने, ‘हामी शान्ति विस्तार गर्न चाहन्छौँ तर सैनिकहरूलाई मुक्त गर्नु आवश्यक छ।’

पेट्रोले सशस्त्र बलले सम्पूर्ण मिके क्यानियनमा पहुँच सुनिश्चित गर्न महिनौँदेखि प्रयास गरिरहेको समेत बताए। मार्चमा सोही क्षेत्रका स्थानीय बासिन्दाहरूले २८ जना प्रहरी अधिकारी र एक सैनिकलाई बन्धक बनाएका थिए। उनीहरुलाई दुई दिनपछि रिहा गरिएको थियो।

कोलम्बियाले पछिल्लो दशकमा खराब सुरक्षा सङ्कटको सामना गरिरहेको छ। पेट्रोले इएमसीसँग शान्ति वार्ता गर्ने प्रयास गरे पनि मुख्य नेता इभान मोर्डिस्कोले वार्ता अस्विकार गरेका छन्। रासस/एएफपी