महिला मिलेर खोलेको अचार उद्योग

परनिर्भरता हट्यो, वार्षिक १५ लाख कमाइ
बिहीबार, माघ १९, २०७९

कपिलवस्तु– कपिलवस्तु बुद्धभूमि नगरपालिका–२ का महिलाले सामूहिक अचार उद्योग सञ्चालन गरेर मनग्य आम्दानी गर्न सफल भएका छन् ।

७ वर्षअघि बुद्धवाटिका अचार उद्योग खोलेर जीविकोपार्जनमा लागेका यहाँका महिलाले मासिक ५० हजार रूपैयाँको कारोबार गर्दै आएका छन् ।

अधिकतम वार्षिक १५ लाख रूपैयाँसम्म आम्दानी गरेको उद्योगकी अध्यक्ष पवित्रा भट्टराईले बताइन् ।

स्थानीयस्तरमै अचार उत्पादन गरी यसलाई व्यवसायका रूपमा अघि बढाउन ६ महिला सामूहिक रूपमा लागेका हुन् ।

घरेलु तथा साना उद्योग कार्यालय तौलिहवाले प्रदान गरेको तालिममार्फत अचार बनाउन सिकेको उद्योगकी अध्यक्ष भट्टराईले बताइन् ।

‘हातमा सीप नहुँदा घरमै बसेर दिन कटाउन बाध्य थियौँ । घरेलु कार्यालयले अचार बनाउने तालिम दियो । यही सीपलाई व्यवसायमा जोडेका हौँ’, उनले भनिन् ।

आफूसहित ६ महिलाको सक्रियतामा उद्योग सञ्चालन भएको उनले बताइन् ।

वाार्षिक रूपमा अचार बिक्री गरेर घर खर्च चलाउँदै आएका यी महिलालाई बालबच्चाको पढाइदेखि आफूलाई आवश्यक परेका सामान किन्न सहज भएको छ ।

‘आफ्नो कमाइ नहुँदा पतिसँग आश्रित हुनुपर्ने थियो । अहिले त्यो बाध्यता हटेको छ’, भट्टराई भन्छिन् । घरको काम सकेर रहेको फुर्सदिलो समयमा अचार बनाउने गरेको उनले बताइन् ।

बुद्धवाटिका उद्योगमा उत्पादित अचारको माग स्थानीय बजारमा मात्र नभएर अर्घाखाँची, प्युठान, दाङ, नेपालगन्ज, बुटवललगायत सहरमा हुने गरेको छ ।

जिल्लाभित्र र बाहिर लाग्ने औद्योगिक मेलामा समेत अचारको माग बढ्दो छ । अचार उद्योगबाट वार्षिक १० हजार किलोसम्म उत्पादन हुने गरेको छ । उद्योगमा विभिन्न ब्रान्डका अचार उत्पादन हुने गरेको छ ।

उद्योगमा आँप, अमला, लसुन, अदुवा, मुला, खुर्सानी, अकबरे–खुर्सानी, अकबरे–तामा, मिक्स, कागती दाना, मेथी, करेलालगायत विभिन्न स्वादका अचार छन् ।

उद्योगका लागि आवश्यक अकबरे खुर्सानी, कागती, बाँसको तामा, टिमुर, लसुन, करेलालगायत सामान बुटवलबाट आउने गरेको उद्योगले जनाएको छ ।

सुरुआती चरणमा अचारले राम्रो बजार पाउन नसके पनि आजभोलि बजारको खासै समस्या नहुने सञ्चालक मीना बेल्वासेको भनाइ छ । अचार बनाउन धेरै लगानी लगाउन नपर्ने बेल्वासेले बताइन् ।

आफ्नै गाउँघरमा उत्पादन भएको अचार प्रयोग गर्न उनको सुझाव छ । ‘हामी कुनै केमिकल प्रयोग गर्दैनौँ, हामीले उत्पादन गर्ने अचार राम्रो हुन्छ’, उनले भनिन् ।

ग्राहकको मुख्य रोजाइ मिक्स अचार हुने गरेको छ । ४०० ग्रामसम्मको मिक्स अचारलाई सय रूपैयाँसम्म पर्ने गरेको छ ।

सबैभन्दा बढी मूल्यको अचार अकबरे खुर्सानीको छ । ४०० ग्रामसम्मको अकबरे खुर्सानीको मूल्य २५० रूपैयाँसम्म पर्छ ।

उद्योगमा उत्पादित अचारको व्यवसायलाई थप फस्टाउने योजना रहेको अध्यक्ष भट्टराईले सुनाइन् । महिला मात्र संलग्न रहेका कारण बजारलाई व्यवस्थित पार्न नसकिएको उनको भनाइ छ ।

आगामी नयाँ वर्षदेखि बाँकेको परान्चु अचार उद्योगसँग सहकार्य गरी व्यवसायलाई थप विस्तार गर्ने योजना रहेको उनले जानकारी दिइन् ।

‘उत्पादित अचारलाई बजारसम्म लैजान सकेका छैनौँ । महिला मात्र भएका कारण बजारको समस्या छ । बाँकेको परान्चु अचार उद्योगसँग समन्वय गरिरहेका छौँ, अब त्यही उद्योगले अचार लैजाने आशामा छौँ,’ उनले भनिन् ।

महिलाले गरेको सामूहिक उद्यमलाई बुद्धभूमि नगरपालिकाले समेत सहयोग गर्दै आएको छ ।

नगर प्रमुख केशवकुमार श्रेष्ठले अचार उद्योगलाई वार्षिक रूपमा अचार बनाउने तालिमका लागि बजेट छुट्याएर सहकार्य गरेको बताए । ‘सीधै बजेट दिएका छैनौँ, तालिममार्फत सहकार्य गरिरहेका छौँ’, उनले भने ।

प्रकाशित मिति: बिहीबार, माघ १९, २०७९  ११:३७
प्रतिक्रिया दिनुहोस्