काठमाडौँ ः राष्ट्रिय युवा संघको आयोजनामा फागुन ११ गतेदेखि काठमाडौंमा ‘केपी ओली कप फुटबल’ हुन लागेको हो ।
खेलाडी जोगाउन फुटुबल सञ्चालन गर्न लागिएको नेपाल खेलकुद पत्रकार मञ्चले जनाएको छ । मञ्चले शुक्रबार आयोजना गरेको पत्रकार सम्मलेनमा संघका अध्यक्ष किरण पौडेलले पछिल्लो समय प्रमुख समस्याको रुपमा देखापरेको खेलाडी पलायन रोक्न र फुटबल खेलेरै बाँच्न पाउने अवस्था बनाउन सहयोग गर्न प्रतियोगिता आयोजना गरिन लागेको बताए ।
‘केपी ओली युवा संघको संस्थापक अध्यक्ष हुनुन्थ्यो, त्यसैले उहाँको नाममा प्रतियोगिता गर्न लागेका हौं,’ उनले भने, ‘अन्य राजनीतिक दलले पनि हामीले झैं प्रतियोगिता गरे भने त्यसबाट पनि खेलाडीलाई फाइदा हुन्छ भन्ने आस गरेका छौं ।’
‘अन्य राजनीतिक दलको तुलनामा केपी ओली धेरै खेल बुझेको, रुचि भएको र खेललाई माया गर्ने भएकाले त्यो भावना खेलमा उतार्दा त्यसले सकारात्मक प्रभाव पर्छ भनेर आयोजना गर्न लागिएको हो,’ उनको तर्क छ ।
केपी ओली कप प्रतियोगिताका लागि अखिल नेपाल फुटबल संघ (एन्फा)ले पनि यसका लागि स्वीकृति दिइसकेको छ । प्रतियोगिताको विजेताले १० लाख र उपविजेताले पाँच लाख नगद प्राप्त गर्ने छ ।
प्रतियोगिताका सर्वोत्कृष्ट खेलाडीले एक लाख तथा उदीयमान खेलाडीलाई ५० प्रदान गरिने छ ।
प्रतियोगिताको उद्घाटन खेल च्यासलमा र बाँकी खेल एन्फा कम्प्लेक्समा हुने एन्फाका उपाध्यक्ष दीपक खतिवडाले जानकारी दिए । प्रतियोगिताको फाइनल दशरथ रंगशालामा हुने पनि उनले जानकारी दिए ।
