बारा- बाराको जितपुर सिमरा उपमहानगरपालिकाको अमलेखगञ्ज चोकमा बसले ठक्कर दिंदा राति ड्युटीमा खटिएका ट्राफिक प्रहरी जवानको ज्यान गएको छ ।
काठमाडौंबाट काँकरभिट्टाको लागि हिंडेको बागमती प्रदेश ०१–००ख ६१२३ नम्बरको बसको ठक्करबाट अमलेखगञ्जमा कार्यरत प्रहरी जवान मुनटुन यादवको मृत्यु भएको प्रहरीले जनाएको छ ।
अमलेखगञ्ज चोकमा शुक्रबार राति सवा ११ बजे ड्युटीमा खटिएका ट्राफिक प्रहरी यादवलाई बसले ठक्कर दिएपछि उनको घटनास्थलमै मृत्यु भएको बाराका प्रहरी प्रवक्ता दधिराम न्यौपानेले जानकारी दिए ।
उनका अनुसार रातिको समयमा चोकमा खटिएका प्रहरी जवान यादवले चेकजाँचको लागि रोक्न खोज्दा बसको ब्रेक नलागेर यादवलाई ठक्कर दिएको थियो ।
प्रहरी जवानलाई ठक्कर दिएको बसलाई नियन्त्रणमा लिएको छ भने मृतक यादवको शव वीरगञ्जको नारायणी बयोध्या मेडिसिटी अस्पतालमा राखिएको उनले बताए ।
प्रकाशित मिति: शनिबार, चैत २४, २०८० १२:३७
प्रतिक्रिया दिनुहोस्
