नेपाल उद्योग वणिज्य महासंघको वरिष्ठ उपाध्यक्ष पदमा उपाध्यक्ष अञ्जन श्रेष्ठले उम्मेवारी दिने
काठमाडौं–नेपाल उद्योग वणिज्य महासंघका उपाध्यक्ष अञ्जन श्रेष्ठले वरिष्ठ उपाध्यक्ष पदमा आफ्नो उम्मेवारी घोषणा गरेका छन् । महासंघको २८ र २९ चैतमा हुने साधारणसभा तथा निर्वाचनमा श्रेष्ठले वरिष्ठ उपाध्यक्ष पदमा उम्मेवारी दिने घोषणा गरेका हुन ।
उनले देशभित्र नै व्यवसायिक र लगानी सुरक्षाको वातावरण बनाउन निर्वाचनमा वरिष्ठ उपाध्यक्षको उम्मेदवारी दिने घोषणा गरेको बताए । उपाध्यक्ष श्रेष्ठले भने, ‘परिवर्तनशील समयअनुकुल नीति निर्माण गर्न पनि मेरो उम्मेदवारी रहन्छ ।’
चीन र भारतको व्यापारमा जुन गतिमा विकास भएको छ त्यस गतिमा नेपाल जान सकेन भने उत्पादक देशभन्दा पनि बजारका रूपमा मात्रै विकास हुने उनको धारणा छ ।
सङ्गठन विस्तार गर्न आफ्नो २० वर्षको अनुभवले सहज हुने दाबी गर्दै निर्वाचनमा सबैले आफूलाई मतदान गरी निर्वाचित गराउने बताए ।
श्रेष्ठले पछिल्लो समय उद्योग वाणिज्य महासंघले साना व्यवसायीहरूका मुद्दालाई उठाएन भन्ने आरोप लाग्न नदिने बताए ।
महासङ्घको विभिन्न उद्योग, राजश्व समिति र रोजगारदाता परिषदमा बसेर काम गरेकाले त्यस अनुभवलाई लिएर अगाडि बढ्ने यनले प्रतिवद्धता जनाए ।
उनले पछिल्लो समय बैंकको ब्याजदरको कारण व्यवसायी मर्कामा रहेको भन्दै बैंकको ब्याजदर कम गर्ने विषयमा गम्भीर भएर लाग्ने पनि बताए ।