काठमाडौँ– आइसिसी विश्वकप क्रिकेट लिग–२ अन्तर्गतको खेलमा नेपाले युएईमाथि १७७ रनको ऐतिहासिक जित हासिल गरेको छ ।
नेपाले दिएको २४९ रनको लक्ष्य पछ्याएको युएई जम्मा ७१ रनमा समेटिएको हो ।
युएईलाई सस्तैमा समेट्ने क्रममा बलर ललित राजंशीले उत्कृष्ट बलिङ गरे । ७.५ ओभर बलिङ गरेका ललितले २० रन दिँदै ५ विकेट लिए । अर्का बलर सन्दीप लामिछानेले २ विकेट लिए भने सोमपाल कामी, दीपेन्द्रसिंह ऐरी र गुल्सन झाको नाममा १/१ विकेट रह्यो ।
नेपाले आज युएईलाई हराएसँगै एक दिवसीय (ओडिआई) मान्यता पनि जोगाएको छ ।
यसअघि नेपालले व्याटिङ गर्दै २४८ रन बनाएको थियो । नेपालले ४९.२ ओभरमा सबै विकेट गुमाएर २४८ रन बनाएको थियो ।
नेपालले खराब सुरुवात गरेको थियो । ७.१ ओभरमा नै ३ विकेट गुमाइसकेको थियो । नेपालले १.५ ओभरमै ओपनर आरिफ शेखलाई गुमायो । उनी शून्य रनमा आउट हुँदा नेपालको २ रनमात्र थियो ।
यस्तै, ४.३ ओभरमा नेपालले अर्का ओपनर कुशल भुर्तेललाई गुमायो । उनी ८ रन बनाउँदै आउट हुँदा नेपालले १२ रन बनाएको थियो । यसैगरी, तेस्रो क्रममा आएका कुशल भुर्तेल पनि ७.१ ओभरमै आउट भए । उनी ९ रन बनाउँदै आउट हुँदा नेपालले २२ रन बनाएको थियो ।
त्यसपछि आएका कप्तान पौडेलले इनिङ्स सम्हाले । उनले अर्धशतकीय पारी खेल्दै ७७ रन बनाएपछि नेपाललाई केही राहत भयो ।
छैटौँ क्रममा आएका आरिफ शेखले ४३ रन बनाए । यस्तै, गुल्शन झाले ३७, दीपेन्द्रसिंह ऐरीले ३४ र भीम सार्कीले २९ रनको योगदान दिए । सन्दीप लामिछानेले र सोमपाल कामीले समान २ रन बनाए ।
