मार्टिनेज पेनाल्टीमा चुक्दा तुलनात्मक कमजोर प्रतिद्वन्द्वीसँग इन्टर मिलानको हार
काठमाडौँ– विश्वविजेता अर्जेन्टिनी फरवार्ड लोउटारो मार्टिनेज पेनाल्टीमा चुक्दा इटालियन सिरी ‘ए’ फुटबलमा इन्टर मिलान पराजित भएको छ ।
गएराति भएको खेलको १४ औँ मिनेटमै मार्टिनेजको पेनाल्टीलाई गोलरक्षक बार्टलोमिज ड्रागोस्कीले बचाएपछि इन्टर तुलनात्मक कमजोर मानिएको स्पेजियासँग २–१ ले पराजित भएको हो ।
घरेलु टोली स्पेजियाको जितमा ड्यानियल माल्दिनी र एमबाला एनजोलाले गोल गरे । इन्टरका रोमेलु लुकाकुले एक गोल फर्काए ।
मार्टिनेजले १४ औँ मिनेटमा पाएको पेनाल्टी सदुपयोग गर्न नसकेपछि पहिलो हाफ गोलरहित बराबरीमा सकियो ।
दोस्रो हाफको सुरुवाती अर्थात् ५५ औँ मिनेटमै माल्दिनीले गोल गर्दै स्पेजियालाई अग्रता दिलाए । त्यसपछि ८३ औँ मिनेटमा लुकाकुलेपेनाल्टीमा गोल गर्दै इन्टरलाई खेलमा फर्काए ।
तर, एनजोलाले ८७ औँ मिनेटमा विजयी गोल गर्न सफल भए ।
यस जितसँगै स्पेजिया २६ खेलबाट २४ अंक जोडेर १७ औँ स्थानमा रहेको छ । जारी लिगमा स्पेजियाको पाँचौ जित हो ।
पराजित इन्टर २६ खेलबाटै ५० अंक जोडेर दोस्रो स्थानमा रहेको छ । इन्टर शीर्ष स्थानको नापोलीसँग १५ अंकले पछि छ ।