मदन भण्डारीको हत्याबारे छानबिन माग गर्दा २१ जनाको हत्या भएको ओलीको दावी
काठमाडौं– नेकपा एमालेका अध्यक्ष केपी शर्मा ओलीले मदन भण्डारी र जीवराज आश्रितको हत्यापछि छानबिनको माग गर्दा २१ जनाको हत्या भएको दाबी गरेका छन् ।
आइतबार सुखानी सहिद स्मृति दिवसको विशेष कार्यक्रमलाई सम्बोधन गर्दै ओलीले भने, ‘मदन भण्डारी र जीवराज आश्रितको हत्या भयो । त्यस सम्बन्धमा आयोग बनाएर छानबिन गर्देउ भनेर माग गर्दा मात्रै २१ जनालाई गोली हानेर हत्या गरियो ।’
कांग्रेसले डेमोक्रेशी रक्षाको लागि भन्दै मान्छे मार्ने गरेको ओलीले बताए ।
‘थुप्रै ठाउँमा देशभरी हत्यो भयो । झापामा डिल्ली गौतमको हत्या भयो । त्यसभन्दा अघि २०३७ साल फागुन १२ गते सिन्धुलीमा ऋषि देवकोटाको हत्या भयो । अरु गोप्य ढंगले अनेक । यसपछि हत्यापछि हत्या भयो’, ओलीले भने, ‘कांग्रेसले डेमेक्रेसीको रक्षाका लागि भन्दै मान्छे मार्न थाल्यो । जनताको जीवनको कुनै मूल्य र अर्थ छैन भन्ने हिसाबले मानिसको हत्या गरियो ।’
पहिला एक दुई जनाको हत्या हुँदासमेत हल्ला भइहाल्ने तर, बहुदल आएपछि कांग्रेसले मान्छे मार्दा डेमेक्रेसी भएको ओलीले बताए ।
माओवादीको शसस्त्र युद्ध गरेको कारण राजतन्त्र हटेको र गणतन्त्र आएको भन्ने दावी गर्ने गरेको भए पनि त्यो सत्य नभएको ओलीले बताए ।
‘नेपालमा के प्राप्तिको लागि मान्छे मारिए ? बहुदलीय व्यवस्था आएकै थियो । आज गणतन्त्रका लागि भनिन्छ । ०६३ सालको सुरूमा द्वन्द्व र हिंसा समाप्त भयो । ६५ सालमा गएर संविधान सभाले राजतन्त्र हटायो भने जनयुद्धले त हटाएन होला ? संविधानसभाकै लागि १६ हजार मान्छे मर्नुपर्छ र ?’, ओलीले भने ।