पोखरा–पोखरामा आयोजना हुने एकमात्र अन्तराष्ट्रियस्तरको फुटबल प्रतियोगिता ‘आहारारा पोखरा’ गोल्डकपको २२ औं संस्करणमा खेल्ने एक विदेशी क्लबसहित १० टिमले भाग लिने भएका छन् ।
प्रतियोगितामा एपीएफ क्लब, मनाङ मर्स्याङ्दी, त्रिभुवन आर्मी फुटबल क्लब, चर्च ब्वाइज युनाइटेड फुटबल क्लब, अमेरिकाको बीवाईएससी, मछिन्द्र, नेपाल पुलिस क्लब, संकटा, धरान फुटबल क्लब र आयोजक सहारा क्लब पोखराले भाग लिने आयोजक सहारा क्लब पोखराले जानकारी दिएको छ ।
क्लबका अनुसार प्रतियोगिता पुस १४ गतेबाट २३ गतेसम्म पोखरा रंगशालास्थित फुटबल स्टेडियममा हुनेछ । पुस १२ गतेबाट सुरु गर्ने समय तालिका सार्वजनिक गरे पनि १३ गते मैत्रीपूर्ण खेल भएका कारण २ दिनपछि सरेको क्लबले जनाएको छ । १३ गते स्पेनको बी डिभिजनस्तरीय क्लब काथेरेन्यो र गण्डकी ११ बीच पोखरा रंगशालामा मैत्रीपूर्ण फुटबल प्रतियोगिता हुँदैछ ।
आयोजक सहाराले यसै संस्करणदेखि प्रतियोगिताको नाम परिवर्तन गरेर ‘आहारारा पोखरा गोल्डकप’ राखेको छ । यसअघिको २१ औं संस्करण प्रतियोगिता विभागीय टोली एपीएफले जितेको थियो भने मनाङ मर्स्याङ्दी क्लब उपविजेता बनेको थियो ।
आयोजक सहारा क्लबले नाम परिवर्तनसँगै आहारारा पोखरा गोल्डकपको पुरस्कार राशीसमेत बढाएको छ ।
क्लबका अध्यक्ष सुरज गुरुङका अनुसार आहारारा पोखरा गोल्डकप विजेताले १२ लाख रुपैयाँ र उपविजेताले ६ लाख रुपैयाँ प्राप्त गर्ने छन् । अघिल्ला संस्करणभन्दा प्रथम पुरस्कारमा २ लाख र दोस्रोमा एक लाख रुपैयाँ वृद्धि गरेको हो । प्रतियोगिताबाछ बचत भएको रकम क्लबबाट संचालित सूर्यबहादुर केसी स्मृति सहारा फुटबल एकेडेमीमा खर्च गरिने बताइएको छ ।
