खोटाङ–आगामी ४ मङ्सिरमा देशभर एकैसाथ हुने प्रतिनिधिसभा तथा प्रदेशसभा निर्वाचनको नतिजा आफ्नो पक्षमा पार्न खोटाङका उम्मेदवार घरदैलोमा अभियानमा जुटेका छन् । १ लाख ४२ हजार ७९२ मतदाता रहेको जिल्लामा नेता आफ्नो उम्मेदवारी दर्ता भएकै दिन गत २३ असोजदेखि मतदाताको घरदैलोमा पुगेर आफूलाई भोट दिन अनुरोध गरिरहेका छन् ।
पुराना अनुहारका उम्मेदवार यसअघि आफ्नो कार्यकालमा पूरा गर्न बाँकी योजना गर्न तथा नयाँ अनुहारका उम्मेदवार एकपटक अवसर दिन अनुरोध गर्दै दिनरात नभनी घरघर पुगेर मतदाता रिझाउन व्यस्त देखिएका छन् । जिल्लाका मतदाता भने ४ मङ्सिरमा हुने निर्वाचन कुरेर बसेका छन् । एउटा प्रतिनिधिसभा र २ वटा प्रदेशसभा रहेको खोटाङमा २६ नेता चुनावी मैदानमा उत्रिएका छन् । निर्वाचन आयोगले १३ कात्तिकभन्दा अगाडि सभा–सम्मेलन गर्न रोक लगाए पनि उम्मेदवारले पार्टीको विस्तारित बैठक, शुभकामना आदान–प्रदान, कार्यकर्ता भेटघाटलगायत विभिन्न बहानामा बृहत् कार्यक्रम गरिरहेका छन् ।
१० स्थानीय तह रहेको जिल्लामा सत्ता गठबन्धनमा आवद्ध नेपाली कांग्रेस, नेकपा (माओवादी केन्द्र) र नेकपा (एकीकृत समाजवादी)बीच चुनावी तालमेल भएको छ । प्रतिनिधिसभा सदस्यमा माओवादी केन्द्र तथा प्रदेशसभा (क)मा एकीकृत समाजवादी र प्रदेशसभा (ख)मा कांग्रेसले टिकट पाएको छ ।
माओवादीबाट पोलिटब्यूरो सदस्य एवं प्रदेश १ का खानेपानी, सिँचाइ तथा ऊर्जामन्त्री रामकुमार राई ‘पासाङ’ तथा प्रदेशसभा (क)मा एकीकृत समाजवादीका प्रदेश १ समन्वय समिति संयोजक वीरबलकाजी राई र प्रदेशसभा (ख)मा कांग्रेसका प्रदेश १ का महामन्त्री भूपेन्द्र राई चुनावी गठबन्धनबाट साझा उम्मेदवार छन् ।
केन्द्रमा एमालेसँग चुनावी तालमेल गरेको जनता समाजवादी पार्टी (जसपा) र एमालेका नेता खोटाङमा भने एक्लाएक्लै चुनावी मैदानमा उत्रिएका छन् । जसपाबाट केन्द्रीय सदस्य प्रतिनिधिसभाका लागि डा कृष्णकुमार राई ‘केके’ तथा प्रदेशसभा (क)मा केन्द्रीय सदस्य राकेश राई र प्रदेशसभा (ख)मा प्रदेश समिति सदस्य प्रेमकुमार राईले उम्मेदवारी दर्ता गराएका छन् ।
एमालेबाट पोलिटब्यूरो सदस्य विशाल भट्टराई प्रतिनिधिसभा तथा प्रदेश समिति सदस्य पाँचकर्ण राई ‘पिके’ प्रदेशसभा (क) र जिल्ला अध्यक्ष रामप्रसाद दङ्गालले प्रदेशसभा (ख)मा उम्मेदवारी दिएका छन् । एमालेबाट उम्मेदवारी दिका ३ जना नेता अहिले मतदाताको घरदैलोमा पुगेर आफूलाई भोट दिएर विजयी गराउन अनुरोध गरिरहेका छन् ।
जसपाका उम्मेदवार पनि अहिले आ–आफ्नो चुनाव क्षेत्रका मतदातालाई रिझाउन दिनरात नभनी गाउँगाउँमा डुलिरहेका छन् । गत ३० वैशाखमा भएको स्थानीय तहको निर्वाचनको नतिजाअनुसार खोटाङमा जसपा पाँचौँ दल हो । जिल्लाका अन्य साना राजनीतिक दल तथा स्वतन्त्र उम्मेदवार पनि आ–आफ्नो निर्वाचन क्षेत्रका मतदाताको घर–घरमा पुगेर आफूलाई भोट दिन अनुरोध गरिरहेका छन् । राष्ट्रिय प्रजातन्त्र पार्टी (राप्रपा)ले प्रतिनिधिसभा सदस्यका लागि एकमात्र उम्मेदवार सर्जु श्रेष्ठलाई अगाडि सारेको छ ।
निर्वाचनमा सत्ता गठबन्धन र एमालेबीच प्रतिस्पर्धा हुने देखिएको राजनीतिक विश्लेषकहरूले बताएका छन् । निर्वाचन आयोगको तथ्याङ्कानुसार ६ पालिका प्रमुख, ४ उपप्रमुख र ३२ वडाध्यक्ष जितेको कांग्रेस जिल्लामा पहिलो तथा २ पालिका प्रमुख, २ उपप्रमुख र २४ वडाध्यक्ष जितेको माओवादी केन्द्र दोस्रो ठूलो दल बनेको छ । भर्खरै स्थापना भएको एकीकृत समाजवादीले १ उपप्रमुख र २ वडाध्यक्ष जितेको छ । गत स्थानीय तहको निर्वाचनमा एमाले खोटाङ जिल्लामा २ पालिका प्रमुख, २ उपप्रमुख र १९ वडाध्यक्षमा तेस्रो भएको छ ।
प्रकाशित मिति: बिहीबार, मंसिर १, २०७९ १६:०७
प्रतिक्रिया दिनुहोस्
