प्रतिशोध र मजाकपुर्ण क्रियाकलापले मानिसलाई सत्यताबाट टाढा राख्छ । सोच्न र कल्पना गर्न पनि नसकिने बिषय आरोप लगाएर रवि लामिछाने र उनको टिमलाई तनाव दिँदा मृत्युवरण गर्नेले सच्चा श्रद्धाञ्जली पाउँदैन । मृतकप्रति सच्चा श्रद्धाञ्जली त्यो हो जुन सत्यतामा आधारित बिषयमा मात्र बहस हुन्छ । रवि जी अब एक ब्यक्ति मात्र होइनन् । उनि सिंगो संस्था र परिपक्व अभिभावक बनिसकेका छन् । अभिभावक भनेको सधैं सही बाटो देखाउने शिक्षक हो । शालिकराम पुडासैनीको मृत्युले रवि जी आँफैले बिक्षिप्तता पीडा भोगिरहेका छन् । किनकी एउटा शिक्षकलाई बिद्यार्थीको पीडाले निकै चोट पुर्याउँछ । रवि जीले भोगेको चरम पीडामा मृतकका बिषयलाई अनुमानका आधारमा चहर्याइरहेको घाउमा कसैले पनि नुनचुक छर्ने गंभिर भुल कदापी नगरौं ।

 

यहाँ प्रसंग रवि जी र उनको समुहको समर्थन वा पक्षपुर्ण हुँदै होइन । हाम्रो समाज भीरतिर किन कुदिरहेको छ भन्ने मात्र हो । हामी किन यति निर्दयी भयौं भन्ने हो । यसले रवि जीलाई मात्र पीडा दिंदैन, मृतकको परिवारलाई झन पीडा माथि पीडा थपिदिनेछ । सामाजिक संजालमा हामीले पोख्ने अभिब्यक्ति र गर्ने टिप्पणी हाम्रा परिचय हुन् । हामीले हामीलाई कस्तो परिचय दिने हाम्रै हातमा छ ।

झुठ, कपोकल्पित, भ्रामक, प्रतिसोध, पुर्वाग्रह र आधारहिन बिषयमा नबोलौं । टिप्पणी वा कुनै बिषय शेयर नगरौं । यसले हामीलाई समाजमा सही परिचय दिनेछ । यस्ता बिषयमा प्रहरीले छानविन गर्छ । न्यायालयले न्याय सुनाउँछ । त्यसपछि चित्त नबुझेका बिषयलाई न्यायालयकै मार्गबाट सुल्झाउने आधारहरु प्रशस्त छन् । हुल र भीडका पछि लागेर आँफै दिग्भ्रमित हुने काम कहिल्यै नगरौं । हरेक घटनाका evidence मा सत्यता प्रमाणित नभइ अनुमान गर्न हुँदैन । यस्ता अनुमानहरु आँफैमा गंभिर अपराधजन्य काम हुन् ।

अर्को कुरा, अनलाइन वा जुनसुकै मिडिया चलाउने र काम गर्नेले तथ्यहिन समाचार कहिल्यै प्रकाशित÷प्रशारण गर्न हुँदैन । यसले सदाका लागि तपाई र तपाईको मिडियाको बिश्वसनीयता समाप्त पार्नेछ । गुमिसकेको बिस्वसनीयता कहिल्यै फर्केर आउँदैन । आज Rabi Lamichhane , सिधा कुरा कार्यक्रम का निर्माता Deepak Bohara र सबै टिम सदस्यहरुलाई हिलो छ्याप्दै गर्दा स्वंय हिलो छ्याप्नेहरु फोहोरको दलदलमा भासिएको भबिस्यमा छर्लंग देखिनेछ । त्यसैले, हामी हाम्रो समाजलाई सभ्य, उच्चस्तर र सुरक्षित बनाउने जिम्मेवार हाम्रै काँघमा छ । हामी जिम्मेवार नागरिक बनौं । असल र सकारात्मक सोचाईले तपाईं हामीलाई सुन्दर र सभ्य परिचय दिनेछ ।

पत्रकार विनाेद त्रिपाठीकाे फेसबुकबाट