डिभोर्सपछि पनि एलिना–बिष्णु सन्जालमा खेलिरहेका छन् चेतावीनयुक्त दोहोरी

काठमाडौं– प्रेम, विवाह अनि डिभोर्स। कलाकारका जीवनमा मात्र हैन आम जीवनमा पनि हुने घटना हुन्। 

तर, जसलाई कानुनले नै अलग गरिसकेको छ आ–आफ्नो बाटो लाग्नुको साटो एकले अर्कालाई आरोप प्रत्यारोप र चेतावनी दिनु कति उपयुक्त होला त्यो पनि सन्जालमा?

गायिका एलिना चौहना र उनका पूर्वपतिबीच अहिले यस्तै चलिरहेको छ। चौहान उनै हुन् जो आफूमाथि भएको नकारात्मक कमेन्ट गर्नेविरुद्ध कानुनी उपचारको अभियानमा लागेकी थिइन्। 

तर, अहिले उनी बिष्णुविरुद्ध प्रतिवादनमा उत्रिएकी छन्। विष्णुले स्ट्याटस राखेपछि उनले तस्बिर राखेर प्रतिवाद गरेकी हुन्।

बिष्णुले शुक्रबार फेसबुकमार्फत् एलिनालक्षित प्रेस नोट जारी गरेका थिए। सामाजिक सञ्जालमार्फत् आफूमाथि नकारात्मक टिप्पणी र भ्रम फैल्याउनेविरुद्ध अस्ट्रेलियामा कानुनी उपचार सुरु गरेको विष्णुको उक्त प्रेस नोटमा उल्लेख छ।

नेपालमा पनि अब कानुनी उपचार सुरु गर्ने उनले बताएका छन्। तर, कोविरुद्ध कानुनी प्रक्रिया थालिएको र थाल्न बाँकी रहेको उनले खुलाएका थिएनन्। एलिनाले लगाएका सबै आरोप झूटा रहेका विष्णुको आशय छ।

विष्णुको धारणा आएको केही घण्टाभित्रै एलिनाले लामो क्याप्सनसहित तस्बिर सार्वजनिक गरेकी थिइन्। क्याप्सनमा उनले आफूले विगतमा भोगेका समस्या मात्रै सेयर गरेको दाबी गरेकी थिइन्।

विष्णुले सम्बन्धविच्छेदपछि पहिलोपटक सार्वजनिक रूपमा मौनता तोडेको केही बेरमै शुक्रबार एलिनाले आफ्नो अनुहारमा चोट लागेको फोटो सार्वजनिक गर्दै भावुक र आक्रोशपूर्ण जवाफ दिएकी थिइन्। 

उक्त क्याप्सनमा आफूमाथि आइपर्ने कानुनी प्रक्रिया सामान गर्ने एलिनाको आशय छ। उनले लेखेकी छन्, ‘यो लडाइँ मेरो व्यक्तिगत मान्छेसँग होइन।

यो लडाइँ हो–त्यस मानसिकतासँग जसले सत्य बोल्ने नारीलाई नै दोषी बनाउँछ। जसले पीडितलाई नै कठघरामा उभ्याउँछ।’

आफूले भोगेको हिंसा सेयर गर्दा कानुनी प्रक्रिया सुरू गर्ने विष्णुको चेतावनीलाई उनले जवाफ दिएकी हुन्।

उनले अगाडि लेखेकी छन्, ‘तर अब म चुप लाग्दिनँ। अब यो केवल मेरो न्यायको लडाइँ होइन। यो हरेक नेपाली चेलीको आवाज हो।’

एलिनाले सामाजिक सञ्जालमा अनुहारभरि चोट देखिने तस्बिरसहित लेखेको पोस्टमा उनीमाथि प्रेम र वैवाहिक सम्बन्धका क्रममा शारीरिक हिंसा भएको खुलाएकी छन्।

‘हामीबीचको कुरा त आपसी समझदारीमै सकिएको थियो। तर समाजको दबाव, सामाजिक सञ्जालको दुरुपयोग र सतही धारणाले त्यो सकिएको कुरा फेरि दोहो¥याएर मेरो व्यक्तिगत जीवनमाथि गम्भीर अन्याय भयोे, उनले भनेकी छन्।