काठमाडौँ –भारतीय क्रिकेट बोर्ड (बिसिसिआई) ले पहिलो पटक आयोजना गर्न लागेको वुमन्स प्रिमियर लिग (डब्लुपिएल) को अक्सनमा नेपाली महिला क्रिकेट खेलाडी सर्टलिष्टमा पर्न असफल भएका छन् ।
नेपालका ५ खेलाडीले आफ्नो नाम दर्ता गराएपनि सर्टलिष्टमा ८ जना एसोसियट खेलाडी परेका छन् । नेपाली खेलाडी कप्तान रुविना क्षेत्री बेलबासे, अलराउन्डर सीता रानामगर, तीव्र गतिकी बलर कविता कुँवर, अश्मिना कर्माचार्य र ब्याटर इन्दु वर्माले डब्लुपिएले नाम दर्ता गराए थिए ।
सर्टलिष्टमा एसोसियटतर्फबाट सर्वाधिक बढी ४ युएईका खेलाडी परेका छन् । युएइकी महिका गौर,वैष्णवे महेश, ईशा ओझा र तीर्थ सतिश अक्सनमा परेका छन् । त्यस्तै हङकङकी का यिङ, नेदरल्यान्ड्सकी स्टेरे कालिस र थाईल्यान्डकी नट्टाकन चन्थम छन् ।
अक्सन फेब्रुअरी १३ मा हुनेछ । अक्सनमा २४६ भारत र १६३ विदेशी खेलाडी छन् । ५ टोलीले बढीमा ९० खेलाडी किन्ने छन् । जसमा ३० विदेशी खेलाडीको कोटा हुनेछ ।
बिसिसिआईले सर्टलिष्टमा ४०९ खेलाडी परेको जनाएको छ । कुल १ हजार ५२५ खेलाडीले अक्सनको लागि नाम दर्ता गराएका थिए ।
डब्लूपिएललमा हरेक टोलीले बढीमा १८ खेलाडी किन्न पाउने छन् । एक टोलीमा ७ विदेशी खेलाडी रहन पाउने छ । जसमा कम्तिमा १ एसोसिएट खेलाडी हुनुपर्ने हुन्छ । प्लेइङ ११ मा ५ विदेशी खेलाडी खेलाउन पाउँदा १ एसोसियट हुनुपर्ने हुन्छ । प्रतियोगिता आगमी मार्च ४ देखि २६ सम्म हुने जनाइएको छ । प्रतियोगितामा कुल २२ खेल हुनेछन् ।
