फोहोर व्यवस्थापनका लागि एमालेसँग सहकार्य गर्न बालेनलाई योगेशको आग्रह

काठमाडौँ– नेकपा एमालेका सचिव योगेश भट्टराईले फोहोर व्यवस्थापनको लागि नेकपा एमालेसँग सहकार्य गर्न काठमाडौँका मेयर बालेन्द्र शाहलाई आग्रह गरेका छन् । प्रतिनिधिसभाको आजको बैठकमा आफ्नो धारणा राख्दै पूर्व मन्त्रीसमेत रहेका भट्टराईले सरकारको भर नपर्न समेत बताएका हुन । इतिहासमै ७१ दिनसम्म काठमाडौँको फोहोर नउठेको भन्दै सचिव भट्टराईले यसअघि १४ दिनसम्म फोहोर नउठेको कुरा स्मरण गरे । उनले भने, ‘यसअघि काठमाडौँको फोहोर १४ दिनसम्म नउठेको इतिहास छ । आज ७१ दिन भयो । प्रधानमन्त्रीले कुनै पहल गर्नु भएको छैन। सम्बन्धित मन्त्रीहरु वेखरब छन् ।’ काठमाडौँ डुङडुङ गन्हाउने भइसक्दा पनि फोहोरका बारेमा सरकार बेखबरमात्र नभएको होइन सरकारको फोहोर उठाउने हुती समेत नभएको भट्टराईको टिप्पणी छ । उनले कामनपाका मेयर बालेन्द्र शाहलाई एमालेसँग सहकार्य गर्न आग्रह गर्दै उनले सरकारको ध्यानाकर्षण नगर्ने जानकारी दिए । उनले भने, ‘म सरकारको ध्यानाकर्षण गर्न चाहन्न । काठमाडौँका मेयर बालेन शाहलाई भन्न चाहान्छु । आउनुहोस् ठोस प्रस्तावसहित । नेकपा एमालेसँग भिजन छ, दृष्टिकोण छ, एमाले पूर्ण क्षमताका साथ तपाईलाई सहयोग गर्न तयार छ । यदि तपाई सरकारको भर पर्नु भयो भने असफल हुने निश्चित छ । काठमाडौँको बर्वादी हुने छ। सांस्कृतिक शहर काठमाडौँको सबै मिलेर रक्षा गरौँ ।’ महानगरले साउनदेखि कुहीने र नकुहीने फोहोरलाई उत्पादन स्थलमै छुट्याएर राख्न अनुरोध गरेको थियो । कामनपाका सहायक प्रवक्ता महेश काफ्ले वर्षायाम भएको र बञ्चरे डाँडा जाने बाटोमा समस्या भएका कारण फोहोर उठ्न नसकेको जानकारी दिन्छन् । यसअघि एक कार्यक्रममा मेयर बालेन्द्र शाहले सिसडोलमा भएको फोहोरका गाडीहरुमाथि भएको तोडफोडलाई लिएर ध्यानाकर्षण भएको जनाउँदै जसरले तोडफोड गरेका हुन् उनीहरुलाई नै क्षतिपूर्ति दिलाउने बताएका थिए ।