भाद्र १, २०७९ बुधबार | Thu Aug 18 2022

मणिपुर पहिरो : मृत्तकको संख्या २६ पुग्यो, ११ बेपत्ताको खोजी जारी



नयाँदिल्ली – उत्तर-पूर्वी भारतको मणिपुरमा पहिरोमा परी मृत्यु हुनेको संख्या २६ पुगेको छ । रेलवे निर्माणस्थलमा भारी वर्षाका कारण गएको पहिरोको भग्नावशेषबाट हालसम्म २६ जनाको शव निकालिएको भारतीय सञ्चार माध्यमले जनाएका छन् ।

पहिरोमा बेपत्ता भएका ३७ जनामध्ये २६ जनाको शव निकालिएको हो । ११ जना बेपत्ताको खोजी कार्य जारी छ । मृतकहरूमध्ये २१ जना प्रादेशिक सेनाका सदस्य र पाँच जना सर्वसाधारण रहेको समाचारमा उल्लेख छ । वर्षासँगै पहिरो खस्ने क्रम जारी रहेकाले बेपत्ता भएकाकोे खोजी कार्यमा कठिनाइ भएको छ । मणिपुर राज्यको राजधानी इम्फाल नजिकैको शहर नोनीमा दुर्गम पहाडी क्षेत्रमा पहिरो गएको हो ।

यस क्षेत्रमा जातीय र जनजाति समूहका लागि छुट्टै मातृभूमिको खोजीमा दशकौं पुरानो सशस्त्र विद्रोहका कारण सेनाले रेलवे अधिकारीहरूलाई सुरक्षा प्रदान गर्दै आएको थियो । उद्धार कार्यमा भारतीय सेना, प्रहरी, उद्धारकर्तासहित बुलडोजर र अन्य उपकरणको प्रयोग गरिएको छ । भारी वर्षा भइरहेका कारण यस क्षेत्रमा थप पहिरोको जोखिम रहेको भन्दै चेतावनी पनि दिइएको छ ।

प्रकाशित मिति : असार १८, २०७९ शनिबार  ४ : ४४ बजे