असार ११, २०७९ शनिबार | Sat Jun 25 2022

गठबन्धन बैठक : नागरिकता विधेयक अगाडि बढाउने प्रधानमन्त्रीको प्रस्ताव



काठमाडौँ – सत्ता गठबन्धनले नागरिकता विधेयक अगाडि बढाउने निर्णय गरेको छ । प्रधानमन्त्रीको सरकारी निवास बालुवाटारमा आज बसेको बैठकले नागरिकता विधेयक अगाडि बढाउने निर्णय गरेको हो ।

बैठकमा प्रधानमन्त्री शेरबहादुर देउवाले नागरिकता विधेयकलाई अगाडि बढाउने प्रस्ताव गरेका हुन् । बैठकपछि सञ्चारमन्त्री सञ्चारमन्त्री ज्ञानेन्द्र कार्कीले बुवा र आमा नेपाली नागरिक हुँदा पनि सन्तानले नागरिकता नपाएको अवस्था रहेकाले त्यसलाई अन्त्य गर्न अग्रसरता लिने निणर्य भएको जानकारी दिए । बजेट पारित भएपछि सरकारले नागरिकता विधेयक अगाडि बढाउने तयारी थालेको छ ।

विधेयक अगाडि बढाउने विषयमा राजनीतिक वातावरण निर्माणका लागि गृहमन्त्री बालकृष्ण खाँणले अग्रसरता लिएका छन् । उनले गठबन्धन र विपक्षी दलका नेतृत्वसँग छलफल गरेका थिए । बैठकले अब नागरिकता विधेयक अगाडि बढाउन गठबन्धनले निणर्य गरेको मन्त्री कार्कीले बताए । बैठकमा शान्ति प्रक्रियालाई चाँडै निष्कर्षमा पुर्‍याउने विषयमा पनि छलफल भएको मन्त्री कार्कीले बताए ।

कार्कीका अनुसार कानुनमन्त्री गोविन्द बन्दीले शान्ति प्रक्रियाबारे अहिलेसम्म भएका प्रगति प्रतिवेदन बैठकमा प्रस्तुत गरेका थिए । चाडैं शान्ति प्रक्रियाको विषय टुंग्याउने सहमति भएको मन्त्री कार्कीको भनाइ छ । यस्तै महँगी बढेको विषयमा छलफल भएको उनले बताए । महँगी नियन्त्रणका लागि सम्बन्धित मन्त्रालयसँग छलफल गरिने उनले बताए ।

प्रकाशित मिति : असार ८, २०७९ बुधबार  ६ : ३८ बजे