आश्विन १६, २०७९ आइतबार | Sun Oct 2 2022

किन युरोपियन युनियन टाइप सी चार्जरमा जोड दिइरहेको छ?



काठमाडौँ– युरोपियन युनियनले सन् २०२४ देखि सबै स्मार्ट फोनमा अनिवार्य रुपमा युएसबी ‘टाइप सी’ चार्जर प्रयोग गर्ने भएको छ ।

जसबाट एप्पल ब्रान्डका फोनलाई भने प्रत्यक्ष असर पर्नसक्ने देखिन्छ । किनकि एप्पल ब्रान्डले आफ्ना फोनमा हालसम्म यूएसबी ‘टाइप सी’ चार्जर प्रयोग गरेको छैन ।

यो नियम लागू भएसँगै एप्पललाई पनि आफ्नो डिभाइसमा यूएसबी ‘टाइप सी’ चार्जर प्रयोग गर्न मिल्ने बनाउन पर्ने दबाब बढ्ने देखिन्छ । युरोपेली युनियनको अनुसार सो नियम सानो र ठुलो साइजको मोबाइल फोन , ट्याबलेट, हेडफोन, स्पीकर, इएरबडमा लागू हुनेछ ।

यी डिभाइस जुन कम्पनीले उत्पादन गरेको भएपनि अनिवार्य रुपमा यूएसबी ‘टाइप–सी’ पोर्टबाट चार्ज गर्न मिल्ने हुनुपर्ने बताइएको छ । उक्त सहमति हालसम्म अनुमोदन भने गरिएको छैन ।

तर युरोपेली संसद् र मन्त्रिपरिषद्ले औपचारिक रुपमा अनुमोदन गर्न सक्ने अपेक्षा भने गरिएको छ । युरोपेली संसद्का प्रवक्ता एलेक्स एगियस सालिबाले युरोपीयन उपभोक्ताहरू लामो समयदेखि प्रत्येक नयाँ यन्त्रमा धेरै प्रकारका चार्जर लाग्ने भएकाले निराश रहेको बताउँदै आएका छन्  । अब उनीहरूले आफ्ना सबै पोर्टेबल इलेक्ट्रोनिक्सका लागि एउटै चार्जर प्रयोग गर्न सक्ने बताएका छन् ।

यसअघि ईयुले सन् २०१४ मा पनि यस प्रकारको मापदण्ड तय गरेको थियो । उक्त निर्णय सोच अनुसार सफल नभएता पनि हाल आएर ईयुले पुनः टाइप–सी लाई अनिवार्य गर्न खोजेको छ । जसले चार्जरको एउटा स्तर तय हुन सक्ने देखिन्छ ।

प्रकाशित मिति : जेठ २९, २०७९ आइतबार  ७ : ५१ बजे