असार १८, २०७९ शनिबार | Sat Jul 2 2022

अब प्रधानमन्त्री भएर देखाउन ओलीलाई प्रचण्डको चुनौती



काठमाडौँ– नेकपा माओवादी केन्द्रका अध्यक्ष पुष्पकमल दाहाल प्रचण्डले अबको चुनावबाट प्रधानमन्त्री भएर देखाउन एमालेका अध्यक्ष केपी शर्मा ओलीलाई चुनौती दिएका छन् ।

सरकारको नीति तथा कार्यक्रममाथिको छलफलमा भाग लिँदै अध्यक्ष प्रचण्डले ओली यसअघि दुईपटक माओवादीकै सहयोगमा प्रधानमन्त्री बनेको भन्दै अबको चुनावबाट जितेर प्रधानमन्त्री बनेर देखाउन चुनौती दिएका हुन् ।

‘पहिलोपटक तपाईंकै भाषामा माओवादीको बैशाखी टेकेर प्रधानमन्त्री बन्नुभएको हो, दोस्रो पटक हाम्रोसमेत मत लिएर प्रधानमन्त्री बन्नुभएको हो ।’ प्रचण्डले भने, ‘लु त अबको चुनावबाट जितेर प्रधानमन्त्री बनेर देखाउनुहोस ।’

उनले छँदाखाँदाको सरकारबाट ओली आफ्नै अहमका कारण हट्नुपरेको, प्रदेश सरकार पनि गुमाएको र अहिलेको स्थानीय चुनावमा खुम्चिनु परेपछि ओलीमा रियलाइजेसन हुने र आत्मालोचना गरेर अघि बढ्ने आशा गरेको तर ओलीमा पुरानै दम्भ कायम रहेको, अर्कालाई गालीगलौच र आरोप प्रत्यारोप गर्ने काममा मात्र सक्रिय रहेको भन्दै आलोचना गरे ।

उनले ओलीको तीन घण्टा लामो भाषणमा वाम एकता र सहकार्यको कुरा गर्ने छन् भन्नेमा आफू आशावादी रहेको तर त्यस्तो कुनै प्रस्ताव आउनुको साटो अर्काे दल र नेतालाई गाली गर्ने काम मात्र गरेको आरोप पनि लगाए ।

एमालेका धेरै नेता कार्यकर्तासँग सहकार्य गरेर अघि बढ्न कुनै समस्या नभएको तर अध्यक्ष ओलीको दम्भ र अहंकार बाधक बनेको प्रचण्डको भनाइ छ । उनले चुनावपछि माओवादी गुगलमा मात्र भेटिने भन्दै ओलीले ब्यङ्ग्य गरेको उल्लेख गर्दै तर अहिले माओवादी केन्द्र एमालेसँग आँखामा आँखा जुधाएर बहस गर्न सक्ने अवस्थामा रहेको पनि बताए ।

प्रकाशित मिति : जेठ १४, २०७९ शनिबार  १२ : ३२ बजे