असार ११, २०७९ शनिबार | Sat Jun 25 2022

 १० पटकका वडा अध्यक्ष व्यञ्जनकार भन्छन्– राजनीति र बागमती उस्तै, उहिले सफा अहिले फोहर

काम गर्न चुनाव जित्नै पर्छ भन्ने छैन



काठमाडौँ –ललितपुरको कुपण्डोल कानदेवस्थान नजिकै छ नरसिंह व्यञ्जनकारको घर । ८१ वर्षका उनी १० पटकसम्म स्वतन्त्र रुपमा वडाअध्यक्ष चुनिएर चर्चामा आए । यसपटक पराजित भएपछि पनि उनी चर्चामा छन् । चुनाव चिन्ह पुतलीबाट जित्दै आएका यी ‘पुतली बाजे’ यसपटक आफ्नै भतिजासँग पराजित भएका हुन् ।

२०२९ सालमा पहिलो पटक स्वतन्त्रबाट वडाअध्यक्षको निर्वाचन जितेका व्यञ्जनकार त्यसयता कहिले निर्वाचनबाट त कहिले सर्वसम्मत भएर १० पटकसम्म वडा अध्यक्ष बने। यसपटक गठबन्धन गरेर ५ दलले आफूलाई हराएको व्यञ्जनकारको आरोप छ । आफ्नो परिवारभित्र नै फाटो ल्याउने गरी टिकट बाँडेका कारण आफूले हार ब्यहोर्नुपरेको उनी बताउँछन् ।

‘नेपालको राजनीति र बागमती उस्तै हो । अहिले बागमती जस्तै राजनीति पनि साह्रै फोहोरी भयो । जनताको सेवा गर्न राजनीति गर्नुपर्नेमा यहाँ त आफ्नो र आफन्तका लागि राजनीति गरिएको छ’ उनले क्यानडा नेपालसँग भने ।

२०५१ सालसम्म बागमतीको पानी सफा रहेको स्मरण गर्दै उनले अहिले बागमतीमा सफा पानी बग्थ्यो भन्दा पत्याउनै नसकिने अवस्था रहेको  वताए

पुराना अनुभव सुनाउँदै व्यञ्जनकारले अहिलेको व्यवस्थाले जनतालाई बढी सास्ती दिएको तर्क प्रस्तुत गरे । उनले भने, ‘पहिला एउटा वडा अध्यक्षले हस्ताक्षर गरेकै भरमा सबै काम हुन्थ्यो । छाप नभएको अवस्थामा अछामे लेखेर पनि कति काम गरिन्थ्यो । अहिले सामान्य कामको लागि पनि जनताले धेरै समय कुर्नु पर्छ । त्यतिमात्र होइन बत्ती गयो भन्दै काम हुँदैन । एउटै फाइल बोकेर हरेकको टेबुलमा पुग्नु पर्छ । जनताले अहिले सास्ती भोग्नु परिरहेको छ ।’

राजनीतिको फोहोर सफा कहिले हुन्छ व्यञ्जनकारलाई थाहा छैन । तर, उनले वाग्मती सफा गर्ने अठोट गरेका छन् । आफू वडा अध्यक्ष हुँदा बेला पदीय मर्यादाले केही काम गर्न असम्भव भएको सुनाउँदै उनले भने, ‘ पहिले स्वतन्त्रबाट जिताए अहिले जनताले मलाई काम गर भनेर स्वतन्त्र छोडेका छन् । काम गर्न मलाई कसैले रोक्न सक्दैन।’

जनताको काम गर्न वडामा कसले जित्छ भन्ने कुराले आफूलाई फरक नपार्ने उनको भनाइ छ । आफ्नै भाइको छोरासँग हारेका व्यञ्जनकारले  कुपण्डोल क्षेत्रलाई पर्यटकीय क्षेत्रका रुपमा विकास गर्ने गरी तयारी गरिरहेको र सरकार बाहिर बसेर पनि ती योजना पूरा गर्ने बताए ।

जनताको सेवा गर्न उमेरले नछेक्ने बताउँदै उनले भने, ‘जनताको सेवा गर्न उमेरले कुनै पनि बाधा उत्पन्न गर्दैन ।’

 

प्रकाशित मिति : जेठ ७, २०७९ शनिबार  ७ : ४८ बजे