जेठ १४, २०७९ शनिबार | Sun May 29 2022

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

बेलायतको स्थानीय निर्वाचनमा नेपालीमूलका पाँच जना विजयी



काठमाडौँ– बेलायतको स्थानीय निर्वाचनमा नेपालीमूलका पाँच जना उम्मेदवार विजयी भएका छन्।

नेपालीमूलका लक्ष्मण गुरुङ, विष्णुबहादुर गुरुङ, जित रानाभाट, कमल गुरुङ र डाक्टर जगन्नाथ शर्मा निर्वाचित बनेका हुन्।

बिहीबार भएको निर्वाचनमा बेलायतभरमा विभिन्न स्थानीय काउन्सिलबाट १० जना नेपालीमूलका उम्मेदवार बनेका थिए।

उनीहरूमध्ये तीन जना काउन्सिलरमा पुनःनिर्वाचित भएका छन् भने दुई जना पहिलोपटक काउन्सिलरमा विजयी भएका हुन्। निर्वाचित हुनेमा तीन जना सत्तारुढ कन्जरभेटिभ पार्टीका उम्मेदवार छन् भने दुई लेबर पार्टीका हुन्।

लन्डनको हन्सलो बरोबाट पूर्वमेयर विष्णुबहादुर गुरुङ तेस्रोपटक काउन्सिलर निर्वाचित बने । लेबर पार्टीबाट उम्मेदवार बनेका गुरुङले १ हजार ३७ मत प्राप्त गर्दै विजय हासिल गरेका हुन्।

यस्तै, लन्डनको बार्नेट काउन्सिलका पूर्वउपमेयर लक्षमण गुरुङ पुनः काउन्सिलरमा निर्वाचित भएका छन्। सत्तारुढ कन्जरभेटिभ पार्टीबाट बार्नेटको एजवेरवरी वडामा उम्मेदवार बनेका गुरुङ १ हजार ६ सय ९१ मत प्राप्त गरी विजयी भएका हुन्।

बेलायतको रोयल बरोबाट पहिलो पटक नेपालीमूलका उम्मेदवार काउन्सिलरमा निर्वाचित भएका छन्। रोयल बरो अफ ग्रीनबीचको प्लमस्टिड एन्ड ग्लिन्डन वडामा लेबर पार्टीबाट उम्मेदवार बनेका रानाभाट विजयी भएका हुन्।

इंग्ल्यान्डस्थित नर्थ योर्कसायर काउन्टी काउन्सिलमा नेपालीमूलबाट पहिलोपटक उठेका डा. जगन्नाथ शर्मा झिनो मतले पराजित भएका छन्। कन्जरभेटिभ पार्टीका उनी ८ मतले मात्र पराजित भए। उनले ५ सय ५१ मत प्राप्त गरेका थिए।

लन्डनकै बार्नेट काउन्सिलको बन्ट्रओक वडाबाट पूर्वगोर्खा कमलबहादुर गुरुङ पहिलोपटक काउन्सिलर निर्वाचित भएका छन्। लेबर पार्टीका उम्मेदवार उनले २ हजार तीन सय ७७ मत प्राप्त गर्दै विजय हासिल गरे।

देशभरको पूर्ण नतिजा भने अझै आउन बाँकी नै छ। समाचार तयार पार्दा सम्ममा प्रधानमन्त्री बोरिस जोन्सनको सत्तारुढ कन्जरभेटिभ पार्टीले विगतमा जितेका सयौं ठाउँ गुमाएको छ । विपक्षी लेबर र लिबेरल डेमोक्र्याटले भने आफ्नो सिट संख्या बढाएका छन् ।

प्रकाशित मिति : बैशाख २४, २०७९ शनिबार  ७ : ५३ बजे